Որքանո՞վ են օգտակար էկզոտիկ մրգերը

Երբ տեղական մրգերի սեզոնը չէ, ասպարեզում հայտնվում են էկզոտիկները։ Ինչո՞վ են դրանք օգտակար։ Կարծիք կա, որ դրանց մեջ պարունակվող հատուկ ֆերմենտներն օգնում են նիհարել։

Սկսենք անանասից։ Այն, իսկապես, մեծ քանակությամբ բրոմելայն է պարունակում, որն, ինչպես մինչեւ վերջերս էին կարծում, օգնում է նվազեցնել քաշը։ Սակայն վերջին հետազոտությունները ցույց են տվել, որ այդ ֆերմենտը միայն սպիտակուցներն է քայքայում, իսկ ճարպափոխանակության վրա խիստ աննշան չափով է ազդում։ Պատճառն այն է, որ բրոմելայնի մոլեկուլն այնքան մեծ է, որ չի կարողանում աղիքների պատերով արյան մեջ թափանցել, այլ քայքայվում է մի քանի մանր «բեկորների», որոնք կորցնում են իրենց ակտիվությունն ու չեն կարողանում ազդել ենթամաշկային ճարպերի վրա։

Պապայան ջրում լուծվող վիտամիններ եւ հանքային շատ նյութեր է պարունակում։ Նրա բաղադրության մեջ մտնող պապաինը քայքայում է սպիտակուցները, իսկ լիպազների խումբը՝ ածխաջրատներն ու ճարպերը։ Սակայն խնդիրն այն է, որ դրանք քայքայելուց եւ արյան մեջ ներծծվելուց հետո օգտակար ֆերմենտները կորցնում են իրենց ակտիվությունը։ Ամեն դեպքում, պապայան կարող է որպես նիհարելու միջոց ծառայել, եթե այն ուտեք ճաշելուց անմիջապես առաջ։ Այդ դեպքում լիպազները կհասցնեն քայքայել հենց նոր կերած ճարպերը։

Մանգոն, ըստ Կամերունի գիտնականների կողմից անցկացված ուսումնասիրության, կարող է ազատել ավելորդ քաշից։ Ճիշտ է, հետազոտության համար օգտագործվել են ոչ թե նրա պտուղները, այլ Աֆրիկայում աճող մանգոյի կոնկրետ տեսակի սերմերի մզվածքը։ Գիտափորձին մասնակցել է ավելորդ քաշ ունեցող 102 մարդ։ 10 շաբաթվա ընթացքում ոմանց տրվել է մրգի մզվածքը, մյուսներին՝ պլացեբոն։ Գիտափորձի վերջում մանգոյի սերմերի մզվածք օգտագործած մարդիկ միջին հաշվով 12,7-ական կիլոգրամով նիհարեցին, միաժամանակ արյան մեջ նվազեց խոլեստերինի եւ շաքարի մակարդակը։ Գիտնականները մանգոյի մզվածքի հետ մեծ հույսեր են կապում, բայց եթե դրանք նույնիսկ արդարանան, մենք երեւի չկարողանանք նիհարել մանգոյի օգնությամբ, քանի որ աֆրիկյան կոնկրետ տեսակի մանգո դժվար թե կարողանանք գտնել։ Ամեն դեպքում, էկզոտիկ մրգերը մեծ քանակությամբ վիտամիններ, հանքային նյութեր ու միկրոտարրեր են պարունակում։ Դրանք հարուստ են C եւ D վիտամիններով, որոնք ամրապնդում են դիմադրողականությունը։

Ամերիկյան բժիշկները համոզված են, որ մանգոյի եւ պապայայի օրական մեկ պտուղ ուտելը բավական է ձմեռային մրսածությունների շրջանում իմունային համակարգն ամրապնդելու եւ սրտային հիվանդությունները կանխարգելելու համար։ P եւ PP վիտամինները (նիկոտինաթթուները) ակտիվորեն պայքարում են աթերոսկլերոզի, հետեւաբար եւ ինսուլտի ու ինֆարկտի դեմ, բարելավում արյան շրջանառությունը։ Նիկոտինաթթվով հարուստ են հատկապես լիչիի պտուղները։ Բետա-կարոտինը նվազեցնում է քաղցկեղի առաջացման ռիսկը։ Հետազոտություններից պարզվել է, որ օրական 250 գրամ մանգո, գուավա, ֆազիլիս կամ պապայա օգտագործող կանայք 17%-ով ավելի քիչ են հիվանդանում կրծքի քաղցկեղով։ Բետա-կարոտինի պարունակությամբ առաջատարը մանգոն է, որն այս առումով գերազանցում է նաեւ գազարին։

Հարցեր, պատասխաններ, մեկնաբանություններ